Në seancën plenare të Kuvendit, deputeti i LDK-së, Anton Quni, sot ka pasur kritika për qeverinë dhe kryeministrin Kurti lidhur me situatën e fundit në veri të vendit.

Ai tha se kërkesës së arsyeshme të ShBA-ve, Kurti iu përgjigj me faza, duke i thënë se miqësia me aleatë nuk forcohet me këste e kushte.

“Ishte një kërkesë shumë dashamirëse dhe e arsyeshme nga aleati ynë më i besueshëm, Shtetet e Bashkuara të Amerikës, e përkrahur fuqishëm nga partnerët evropianë”.

“Ju kryeministër, aleatit të Kosovës iu përgjigjet me faza e fraza, me periudha e etapa, e të tjera. Kryeministër, nuk bën të forcohet miqësia me kushte e rata e këste”.

Tutje, Quni tha se ai mund të tregojë pushtet në raport me opozitën, por, ai i tha se Kosova nuk është e qeverisë, por e popullit.

“Kryeministër, mundesh me u ndi i pushtetshëm me opozitën, mund të vazhdosh ta ushtrosh pushtetin me mospërfillje e cinizëm me padëgjueshmëri e populizëm mirëpo Kosova nuk është e qeverisë. Është e popullit, andaj këtu po flasim për Kosovën e të gjithëve”, theksoi Quni./arbresh.info/